Fundación Celta e Celta Baloncesto afianzan a súa histórica relación

A Fundación Celta de Vigo e o Celta de Baloncesto afianzan unha relación histórica e emblemática coa renovación por dous anos dun importante convenio para o apoio e potenciación do deporte base local. O acordo, asinado polo Presidente celeste Carlos Mouriño e o seu homólogo no Celta Baloncesto Zorka Recalvi Carlos Álvarez, inclúe entre outras medidas o acceso gratuito dos abonados do RC Celta aos partidos do Celta Baloncesto. Ao acto da firma tamén asistiron a conselleira celeste María José Táboas e o director da Fundación Celta Germán Arteta.

O presidente do Celta Zorka Recalvi expresou a súa satisfacción pola firma deste convenio e destacou que “é unha axuda moi importante para nós que nos dá ese empurrón para intentar dar un pasito máis”. Sobre as súas expectativas para a próxima tempada indicou que “mellorar a pasada campaña vai ser moi difícil, pero temos moita ilusión. É un proxecto novo e queremos ver se somos capaces de dar ese paso de volver á Liga feminina e despois facer tamén a nosa propia operación retorno, esa é a miña ilusión”.

O Celta Zorka Recalvi é un dos clubs locais máis laureados tanto a nivel rexional como nacional. Ao longo da súa historia o club logrou 4 campionatos de liga e 5 subcampionatos, 4 copas da raíña e 5 subcampionatos e proclamouse campión da copa de Galicia en 12 ocasións.

O acordo, asinado esta mañá en A Sede, que terá unha duración de 2 anos, inclúe, ademais do acceso de calquera abonado do RC Celta aos partidos do Celta Baloncesto, diversas accións de promoción conxuntas e a cesión da marca Celta, así como diverso material deportivo para as categorías inferiores do club.