O RC Celta afronta en apenas uns días unha cita que marcará un antes e un despois na historia do club. O vindeiro sábado 30 de novembro terá lugar o acto de colocación da primeira pedra da súa nova cidade deportiva, un lugar que moi pronto será o fogar do primeiro equipo e de toda a canteira celeste.
Con este paso, o RC Celta acelera na construción da primeira fase deste novo complexo deportivo, que contará con dous campos de céspede natural e un edificio que garante todos os servizos adecuados.
Este ilusionante proxecto, vital para o futuro da entidade e o desenvolvemento dun dos seus alicerces como é a canteira, contará ademais con oito terreos de xogo (catro naturais e catro artificiais), zona de tecnificación, zona de praia para rehabilitación e outras actividades, estadio con capacidade mínima para 4.000 espectadores, pistas de pádel e tenis, piscina, residencia, cafetaría-restaurante, tenda do club, universidade do deporte, pavillón deportivo multiusos e ximnasios.
