Sufriuse e moito, pero o Celta logrou rescatar un punto no sempre complicado campo do Athletic grazas a un gol do canteirán Brais Méndez no tempo de desconto, o primeiro do mozo centrocampista co primeiro equipo celeste. Foi unha tarde de estreas goleadoras. No minuto 55, tras un bo puñado de ocasións dos bilbaínos, Unai Núñez aproveitou un balón rexeitado polo poste para debutar como goleador co Athletic.
Salvo ese tanto de Núñez, os locais non lograron materializar a súa superioridade en ningunha das numerosas ocasións que tiveron. Os cambios no tramo final do choque refrescaron as ideas a un Celta adormentado ata entón. O encontro cambiou por completo e transformouse nun espectáculo trepidante no que os celestes pareceron rexurdir. Así foi. Xa no tempo extra, e tras unha fantástica xogada colectiva, Brais Méndez perforou a portaría de ‘os leóns’ e puxo o empate no marcador.
Non morreu aí o partido. Pouco despois Hugo Mallo estrelou o esférico contra a madeira e a continuación Tucu marcou en fóra de xogo. O Celta espertara tarde. O partido non estivo exento de polémica. Os xogadores do Athletic Club reclamaron penalti en polo menos dúas xogadas, pero o colexiado non percibiu falta en ningunha das ocasións. O Celta mídese a próxima semana ao Sevilla FC (sábado, 16:15, Balaídos), un enfrontamento no que non poderá participar Maxi Gómez por acumulación de cartóns.
1-ATHLETIC: Kepa, Balenziaga (Lekue, min.80), Íñigo Martínez, San José, Iturraspe, Williams, Núñez, Susaeta, De Marcos, Raúl García (Beñat, min.79), Córdoba (Aduriz, min.71).
1-CELTA: Sergio, Hugo Mallo, Cabral, Sergi Gómez, Jonny, Lobotka, Radoja (Brais, min.73), Wass (Tucu Hernández, min.63), Iago Aspas, Maxi Gómez, Boyé (Sisto, min.63).
Goles: Unai Núñez (1-0, min.55); Brais Méndez (1-1, min.91).
Árbitro: Del Cerro Grande, do comité madrileño. Amonestou a Williams, Íñigo Martínez, Unai Núñez (Athletic); Maxi Gómez (Celta).
Campo: San Mamés.
Observacións: Maxi Gómez viu o quinto amarelo e cumprirá sanción a próxima xornada (Celta-Sevilla).
