afok.jpg
Celtismo

Último episodio de ‘A Nosa Reconquista’ con invitacións e prezos reducidos

RC Celta

Queda unha última batalla, un episodio máis de ‘A Nosa Reconquista’, o paso definitivo. O RC Celta recibe este sábado ao Rayo Vallecano (20.45 horas) co único obxectivo de pechar a permanencia, ese reto que hai exactamente 43 días parecía imposible cando o Villarreal gañaba cero dous ao descanso. Desde entón, catro vitorias, tres empates e só dúas derrotas, 15 puntos para chegar á última xornada sen depender de ninguén.

O RC Celta chega a este partido final cunha situación favorable, con tres puntos de vantaxe e unha diferenza de goles de máis seis fronte ao Girona. Situación favorable que hai que transformar en definitiva cunha vitoria coa que, ademais, agasallar a unha afección extraordinaria.

Para este partido, o club reactiva ‘A Nosa Reconquista’. Os abonados celestes terán invitacións á súa disposición o martes e o mércores tanto nos despachos de billetes do estadio como online. Cada abonado poderá retirar a partir das 11.00 horas unha invitación para a súa mesma bancada nos despachos de billetes -imprescindible presentar o carné de abonado (non se admitirán fotocopias nin fotos no móbil) e en ticketsabonados.rccelta.es. Nas billeteiras, cada abonado pode xestionar como máximo catro invitacións con outros tantos carnés. O martes e o mércores non haberá entradas á venda, xa que se prioriza que cada abonado poida dispor da súa invitación.

No caso de que o xoves siga habendo entradas dispoñibles, poranse á venda con prezos reducidos, que oscilan entre os 10 e 35 euros en categoría adulto, mentres que os billetes sub-25 terán un prezo único de 5 euros para todas as bancadas.

O club comunicará nos próximos días novas iniciativas para este último partido da competición.

RC Celta

Etiquetas

Celtismo

Noticias recomendadas