Cinco xogadores celestes continúan competindo coas súas seleccións nacionais: Rubén e Jonny con España Sub-21, Hjulsager on Dinamarca Sub-21 e Marcelo Díaz e Pablo Hernández con Chile. Os españois e o danés arrincaron a súa participación no Europeo Sub-21 de Polonia, mentres que os dous chilenos debutaron en Copa Confederacións de Rusia.
ESPAÑA 5-0 MACEDONIA
Os canteiráns celestes Rubén e Jonny presenciaron desde o banco a goleada de España a Macedonia no primeiro partido do Europeo Sub-21. O combinado español disputa o seu próximo choque o martes 20 ás 20:45 ante Portugal (TV: Cuatro).
DINAMARCA 0-1 ITALIA
Hjulsager foi titular con Dinamarca e disputou os 90 minutos da derrota pola mínima ante Italia. O atacante céltico foi a referencia ofensiva do cadro danés e un dos futbolistas máis destacados do encontro. O combinado nórdico xoga ante Alemaña o mércores 21 ás 20:45 (TV: Be Mad).
CHILE 2-0 CAMERÚN
A vixente campioa de Sudamérica, Chile, superou a Camerún no seu debut en Copa Confederacións. Marcelo Díaz foi titular e completou o partido, mentres que Pablo Hernández presenciou o encontro desde o banco. Un gol anulado polo sistema VAR e outro tanto no que se fixo esperar a decisión para celebralo, marcaron o choque. Chile xoga o xoves 22 ás 20:00 ante Alemaña (TV: Gol).
