Iago Aspas recolleu este luns en “La Central”, establecemento de restauración situado no centro histórico vigués, o seu segundo premio “Xogador Estrela Galicia” da tempada. A través dunha votación realizada nas redes sociais do RC Celta, a afección decantouse unha vez máis polo dianteiro moañés como o futbolista con mellor rendemento do mes, encadeando así dous galardóns consecutivos tras o conseguido no mes de Outubro. Omar Fares Montoya, propietario-xerente de “La Central”, foi o encargado de entregar o trofeo ao xogador galego.
Ademais de agradecer o agarimo do celtismo, Aspas quixo dedicar o trofeo aos seus compañeiros de equipo, “grazas ao que todo é máis fácil”. O atacante continúa sumando recoñecementos na recta final dun 2016 que foi excelente no grupal e no persoal. “É un ano inesquecible”, asegurou.